لما بتشتي الدنيا
نبيل عماري
بتذكر شكلي وانا صغير
حامل شنتة بين كتافي
شتا وبرد والريح بيصفر تصفير
بتمنى ادفى تحت لحافي
وأصل البيت بكير
تلاقيني أمي بمحبة
وع الصوبة ومسح البشكير
بشم ريحة العدس جايه
ع خشمي زي العبير
وفت الخبز وهباله الزاكي
واللمة والبرد كثير
واسمع صوت الشتا بزخاتو
والتلفاز هو السمير
نقعد ع السجادة ندرس
ونحل حساب ونكتب تعبير
وأن برقت نضحك شوي
ونخاف من رعد الهدير
كنا نغني يارب تشتي
والكعك مدور تدوير
ممكن يكون بحرف S
وقرشلة والمطر غزير
والراحة ويا البسكوت
وشاي الفراشة ابو حجم صغير
وياريت ما كبرنا وبقينا حد الصوبة
ولا صار العمر كبير
وترجع ايام البركة والخير
بدل ها لعالم المكدر تكدير
احياناً برجع للماضي
واتذكر شكلى وانا صغير
ليست هناك تعليقات:
إرسال تعليق