اسكني قلبي اللي حبّك
عيشي فيه واتمكني
أصله بيتك مأوى قلبك
اوعي مرة يصدني
قلب حلم يليق بحبك
والخيال فيه شدني
أربع اوض
اتنين اذين واتنين بطين
واسعين قوي مش ضيقين
والواجهه بحري اطمني
الصاله فيه متشعبة
على قطعتين
وسط الحشا والاوردة
قاطعة الوتين
شطبته لوكس ماهمني
أمّا الفراندة قفلتها
بصمام أمين
علشان ماحدش يلمحك
م المحرومين
غير عيني بس
فيه عدادات الكهربا
أو غاز وميه
بتعد دقات قلبي أنا
بكروت ذكية
ف الثانيه ألف
أرضيته باركيه حنان
وحيطانه ستر من الزمان
مدهونه عطف
آه لو تحني وتسمحي
وتشرفيني وتفرحي
لو يبقى بيتك مطرحي
يجمعنا سقف
اسكني
بقلمي/خالد جمال ٣١/٥/٢٠٢٥
ليست هناك تعليقات:
إرسال تعليق