إن غاب يوم عني حبيب العين
بتحمل بعده بأعجوبة
والدمعة بتنزل ع الخدين
تكويني بحرقة وبصعوبة
وبيبقى فاضلي يومين اتنين
بعديها بخش ف غيبوبة
والقلب يقوللي هدق لمين
والروح تشكيلي أنا مسحوبة
والفرحة تغيب وتفوتني حزين
وتقوللي وداع من دي النوبة
والبسمة الشابة ف ثانية تشيب
وبتبقى عجوزة وكركوبة
والعقل يغيب بعديه ويسيب
ف ظنون سكناني ومرعوبة
قلقان بيودي معاه ويجيب
والحيرة دي خية ومنصوبة
والكون بلاقيه جرح وتعذيب
والغربة عليا أنا مكتوبة
وبتحيا الروح عمرها ف نحيب
بتعيش أيامها ومغصوبة
يا حبيبي غيابك بكى العين
والراحة ف بعدك مسلوبة
اختار لي معاك حل من اتنين
دانا روحي ف حبك مغلوبة
يا تجيني وتسكن ضي العين
وتقول للبعد خلاص توبة
يا ف بعدك تلغي اليوم بسنين
من عمري تكون مش محسوبة
غيبوبة
بقلمي/ خالد جمال ٣٠/٨/٢٠٢٥
ليست هناك تعليقات:
إرسال تعليق