هتبعت وردة هبعتلك قصادها إتنين
هتكتب كلمة هكتب فيك أنا دواوين
ويوم ماتعدّي بس علّيا وتشاور
هروح عندك وهستناك سنين وسنين
وهكتبلك كلام في العشق ماسمعتوش
وهرسملك طريق للحب مامشيتهوش
وهَبنيلك مكان في القلب ماوصلتوش
لا جه على بال ولا حتى تشوفه العين
هتبعت وردة هبعتلك قصادها إتنين
هتبعت نظرة هقعدلك قصاد البيت
وأغنيلّك أغاني العشق لو حبّيت
ويوم بس أمّا تتمنّى كده تشوفني
هتلقاني يا أعز الناس في لحظة جيت
بنادي عليك وأحقّق كل أحلامك
وأفرشلك طريق م الورد قدامك
هكون نبضك وأكون لحن لأنغامك
وأكون ضلّك معاك دايماً شمال ويمين
هتبعت وردة هبعتلك قصادها أتنين
سنين فاتت عليك قاعد بتستنى
سنين عدّت يادوب تحلم وتتمنّى
أنا جيتلك خلاص فارس لأحلامك
وأخلّى سنينك الجايه كده جنه
بقولها بعلو صوتي والحياة شاهدة
لو إنك بس يوم تحن أو ترضى
هأقدّملك بدال الوردة 100وردة
وهزرعلك بدال ال100 دي بساتين
هتبعت وردة هبعتلك قصادها إتنين
هتكتب كلمة هكتب فيك أنا دواوين
بقلمي عبدالحميد وهبه
ليست هناك تعليقات:
إرسال تعليق