بهواه من قبل ما يبقى جنين
من وقت ما كان الكون غابة
وعشقته يدوب عمر السنتين
قبل اما يقول ماما وبابا
مشغول بيه قلبي آسرني سنين
من غير حراس ولا بوابة
مش عارف عشقي واخدني لفين
كل اللي اعرفه دُبت صبابة
لو عدى يسيب ف القلب حنين
وف نبض الروح نار لهابة
والعقل يهيم ويا الهايمين
وفي نني العين يمحي كآبة
ومحال من بعده تشوف حلوين
ما هو غطى على العين بسحابة
والروح ترقص لهواه وتميل
والقلب يغني على ربابة
ده الشوق ف القلب تملي يزيد
ويطول في الفضا أعلى سحابة
كما فرع لورد يا ناس ع الحيط
بيزيد ع الخيط مع لبلابة
داحنا بروح واحدة ف نبض اتنين
من قلب لقلب دي وثابة
عملة يا ناس نادرة وليها وجهين
مطلية بشوقنا ودهابة
الصورة دي وجه حبيب العين
وعهود الهوى أحلى كتابة
يا حبيبي خلاص انا دُبت حنين
ودموع العين ليك منسابة
ما تحن يا عمري على المسكين
دانا روحي في عشقك دوابة
بقلمي/ خالد جمال ٢٦/٧/٢٠٢٦
ليست هناك تعليقات:
إرسال تعليق