انتي وسط الحلو تورتة
انتي جوه الزبدة مورتة
تورتة شادة العين إليها
مورتة دايبة هموت عليها
انتي كل ما فيكي قشطة
انتي للأزهار شذاها
انتي للأطيار سماها
واخدة م الشمس الجلال
سارقة م البدر الهلال
حلوة من وقت البافيته
انتي نادرة ومستحيلة
انتي ترياق روح عليلة
لمسة منها جراح تطيب
صوتها شدو لعندليب
لحن ساري ف كل حتة
انتي زي النسمة هادية
انتي وردة صبح نادية
خير وطارح ف الغيطان
جوري سارح ع الحيطان
حضن دافي ف ليلة شاتية
انتي قصة شوق طويلة
انتي ليلة ف ألف ليلة
ضي وسط العتمة بان
فجر بيدق البيبان
ضل فارد فوق نجيلة
انتي نبع وسيل حنان
انتي حبك فيض أمان
جه ف خوف القلب دوِّب
قاله امشي إياك تهوِّب
جه وطاب ليا الزمان
ايوه انتي وانتي وانتي
ياللي جوه الروح سكنتي
مهما اقول عنك واعيد
مهما في الأبيات هزيد
مش راح اوصف شوق وليد
عشق سال دم ف وريد
أو هعبًَر عنك انتي
بقلمي/ خالد جمال ٢٩/٨/٢٠٢٦
ليست هناك تعليقات:
إرسال تعليق