مش زمانّا اللي احنا فيه
مش مكانّا ومش أوانّا
داحنا غُرَبا يا ناس عليه
فيه بنحيا غصب عنا
مش كمان أخلاقنا دي
مش طباعنا ومش ف دينا
ايه جرالنا يا خلق ايه
اللي جد ف مجتمعنا
الأوان راحت عليه
والمكان مابقاش يسعنا
الحياء صعب تلاقيه
صار خرافة مالوهشي معنى
ليه الصحاب والأهل ليه
جم علينا وكله باعنا
ليه الضمير غمّض عنيه
مات وفوق اشلائه سِرنا
ضل فينا الحق ليه
ساب طريقنا وخط سيرنا
ليه الحبيب بنهون عليه
باع غرامنا وليه خسرنا
ليه اللئيم بيعلُّوا فيه
واللي طيب ضاع مابينا
ليه الصبور ضاق خُلقه فيه
والغضب بقى شرع بينا
ليه الكريم ضنت ايديه
ع الفقير وشايفها مِنَّة
ليه الصريح بيحاربوا فيه
والنفاق بقى حته منا
الشيطان يا سلام عليه
جِه سِكنّا وعاش مابينا
فين زمانا يا دنيا فين
فين مكانا خلاص تعبنا
امتى نرجع تاني ليِه
امتى ييجي يدق بابنا
مش زمانا
بقلمي/ خالد جمال ٤/٩/٢٠٢٦
ليست هناك تعليقات:
إرسال تعليق