قعدت أقلب فى الصور جوه ألبوم ذكريات
وأشوف وشوش كتير اتغيرت ووشوش خلاص اتبخرت
فارقت خلاص بس لسه ساكنين بين الضلوع
وأشوف صور للأماكن والصحاب اللى فضل واللى أصبح ذكريات
وأقول لنفسى ياه العمر جرى وأفتكر
نفسى من بين الصور وأقولها كنت بتحلمى باليوم اللى تتحل الضفاير
وتكبرى
كنتى بتدعى صبح ليل امتى تكونى زى الكبار
أهو دلوقتى بنقول ياريتنا فضلنا صغيرين
على الأقل كنا فى حضن الحبايب مطمنين
أجرى على أمى وأبوس ايديها الطيبين
وأنام وأنا مش شايلة للأيام دى هم
لكن ياسرعة الأيام صبح كل شئ فى الهوا
ذكريات فى الصور أصبح مكانها تتحكى ونبتسم
ومنها اللى بيفكرنا بوجع لما كنا مكشرين من غير سبب
مع اننا فى وقتها ماكانش فى بالنا انها تصبح فى يوم ماضى انتهى
لكل ألبوم صور ذكريات فيها اللى عدى واللى لسه ما انتهاش
واللى لسه بيه مكملين حياتنا وعايشين من سنين
ولو نتسأل عايزين ايه من ألبوم صور
عايزين كل اللى كانوا بيحلوا دنيتنا معانا
عايزين روحنا اللى سيبناها هناك وكبرنا واحنا لسه صغيرين
كلماتى: بسمة سماح
ليست هناك تعليقات:
إرسال تعليق