زجل ...
انا عارفة وانت عارف
اللي بينا كان وعد
ماكانشي تخارف
كان حياة كلها امال
كان حب كله جمال
واليوم انا كنعتارف.
بلي ظني فيك خاب
ياللي كنت اعز الاحباب
كنت ربيع صدق سراب
هاجر الفرح وسد الباب
غادر سما عمري وانصارف
شاخ القلب اللي كان شباب
من حر الشوق ذبل و ذاب
عود وروده يابس وناشف
فين هواك للي كان روا
كان عمار ورجع خوا
بعٌَد على طريقي وانحارف
ريحة الغدر فاحت وباحت
ودموع الضر من عيني ساحت
اكتاشفت ومازالة نكتاشف
بللي عمرى معاك راح خسارة
واعرف بللي الدنيا دوارة
و غدا نلقاك قدامي واقف
تطلب السماحة مانسمح ليك
والواد للي غرقني يديك
تبكي وتنوح ترجا ترتاجف
تذوق الذل من نفس الكاس
تقاسي العذاب تشداگ النعاس
مانولي لعذابك وقلبي حالف
حتى يردك عبرة ما بين الناس ...
زينب الكريضة المغرب.
ليست هناك تعليقات:
إرسال تعليق