قول يارب (543)
..............
وأخريتها أيه يا دنيا
يوم مر ويوم عذاب
يوم نتنسم لفرحه
نتفاجئ قلب غاب
مكتوب لي أعيش أسيرك
إجباري وإنتساب
حافظ أكوام خداعك
زى ما قال الكتاب
كوم طاطي عشان تعيش
والعمر غموس فى عيش
سايبه لي ميه علامه
أحزان بصمات في فيش
دي دموع وجع الغلابه
طول عمره ما تنتهيش
ناحته فى خطين علامه
ع الخد متتنسيش
متحني سنين بصبري
ضامناني ما بشتكيش
مترين تنهي الحكايه
والروح تطلع فطيس
لا نسيت ظلم البدايه
محروم مش عارف أعيش
ومهما أحايلك تدوسي
دفناني بكل طيش
أصرخ طب مين هيسمع
والناس فى الهم ريش
لا هي طايله الأرض مرسا
وحيارى منين تعيش
أحلام حتى الغلابه
حالفه إن ما تزورنيش
ومهما الليل راح يطول
يجي النهار وهعيش
وأتعوذ من شيطاني
كاتم أنفاسي خيش
أخر سطر الحكايه
أملي فى الله بدايه ونهايه فكر طيش
إرمي حمولك على الله
وقول يارب ضله
وفى سترك بس أعيش
بقلم .. صبري رسلان
ليست هناك تعليقات:
إرسال تعليق