فجأة إتغيّر بقلم عبدالحميد وهبه

(فجأة إتغيّر)

لما لاقيتُه فجأة إتغيّر 

وِبَقى يكلّم غِيري 

ده خلّاني أراجع نَفسي 

وأحِِّسّ بتقصّيري 

جايز يعني العيب كان فيّا 

وأنا ما آخدتّش بالي 

فعلاً كان الحق علّيا 

سيبتُه لوحدُه ليالي 

أوقات ياما كِتير أهمَلتُه 

ياما بِعدت أنا عنُه وسيبتُه 

وهو في أصعب حالة

حاسّة بجد بإنّي ظلمتُه 

ما أتذكّرشِ في يوم طمِنتُّه 

حتى ولّو برسالة 

فجأة لاقيتني بعاتب نفسي 

وفجأة تعبني ضميري 

لمّا لاقيتُه فجأة إتغيّر

وبقى يكلّم غيري 

لما لاقيتُه فجأة إتحّول 

بمشاعرُه وتفكيرُه 

إتذكّرت إن أنا في الأول 

سيبتُه وروحت لغيرُه 

يعني أكيد كان عذرُه معاه 

يعمل يعني اللي على هواه 

ويشوف فين مصلحتُه

لمّا صِبر على بُعدي كتير 

ولا كان يلقى في يوم تقدير 

راح دوّر على راحتُه 

فجأة لاقيتني بعاتب نفسي 

وفجأة تعبني ضميري 

لمّا لاقيتُه فجأة إتغيّر

وبقى يكلّم غيري 

بقلمي عبدالحميد وهبه