كلام في الحب
بقلمي يحيى حسين
الحب مش كلمة تتقال
من أول حرف نصدقها
ومع أول غيمة بتعدي
نلقاها حبيبتي تغرقها
الحب لو صادقة مشاعره
براكين الدنيا ما تحرقها
ولو كانت الدنيا سباق
بالحب نكسبها ونسبقها
قولتيلي في مرة بحبك
صدقت الحب وصدقتك
حبيت الحب وأنت معايا
أشتاق للحب وأشتاقلك
رممتي جوايا حاجات
جوايا كانت مكسورة
وبنينا بأحلامنا العش
وحبيبتي هي العصفورة
حبيتك من غيرما أغش
زينتي حروفي المأثورة
قربتي حبيبتي فقربت
وبعدتي عزيزتي ما غربت
وغروبك كان صعب وقاسي
ولقسوة بعدك جربت
جرحني أهمالك بالشوك
كدبت جوايا الإحساس
وصارحتك وقولت صارحيني
قولتيلي دا كلام الخناس
وفضلتي حبيبتي على حالك
وأنا وحدي في الليل الحالك
تكويني ظنوني وأحزاني
والفرح جوايا أكيد هالك
وصارحتك من تاني وقولت
ومن صمتك جربت ونولت
وتيار الصمت يكويني
يحرق قلبي بمليون ڤولت
دلوقتي متأخر ردك
بعد عزوفك عني وصدك
ردك أتاخد ضدك
نزع من قلبي خلاص ودك
لكنه لا حيجرح ولا يهد
مهدود من قبلك من بعدك
عداد القسوة بيعد
مش فارقه معاه قربك بعدك
ولكني أتعودت أسامح
مهما القلب كان مجروح
وألملم الحزن الجامح
وأبني منه في قلبي صروح
وصروحي بتهد في روحي
يصرخ قلبي وعنها يبوح
لكن يا عزيزتي من الآخر
قبل ما أروح بعيد أتاخر
أقولك يا عزيزتي وأنا بتفاخر
لا عمري حنثت بيميني
ولا عمري يوم بنسى الوعد
يبقى سيفي بيميني
فأسامح وأهاديه بالورد
يحيى حسين القاهرة
2 أغسطس 2021
ليست هناك تعليقات:
إرسال تعليق