بطلت اعاتب
بطلت احاسب
بطلت اجري
علي ناس ما يستهلوش
بطلت احب
بطلت اكره
بطلت اسأل
دول ليه ما جوش
بطلت اداوي
بطلت اطبطب
بطلت. امسح
دمع مغشوش
خلاص زهقت
من دي وشوش
انا كنت شايلهم
بين الرموش
لا جار شافع
ولا صاحب نافع
يا مصلحجية
بسبع وشوش
لما فلوسي
كانت كتيرة
كانوا لي حرس
ما بيناموش
ولما راحت
مني فلوسي
لعند بيتي
ما يخبطوش
تاهت ملامحي
وبقي لوني قمحي
واتغير وشي
بين الوشوش
خدها نصيحة
مني صريحة
عل الأصل دور
ما ترمرموش
بقلم
احمد محمود
من ديوان حبة رتوش
ليست هناك تعليقات:
إرسال تعليق