شعر "سعيد حمدى محمد
★★★★★★
كل يوم همك يجي على بيت جاري
وانا خايف لا يغلط ويفط على داري
وعايش سنين مهموم والدمع جاري
لحد الجرح ما دبح الفرح
والفلاح زود همي ومراري
★★★★★
لما بات ليله سهران
يتفرج ويسقف للأحزان
وعيون عياله أهي بصاله
وهوه بيزرع جواهم افعاله
بفلم الساحر والشيطان
★★★★★★
علمهم حرت الارض وازاي تتخضر
علمهم ازاي نبني ونعلي ونعمر
وبلاش تزرع جواهم ضياع
وتملا قلوبهم باﻷوجاع
بكره تجني ودمعك ع الخدود جاري
★★★★★★
ياما بدرت فيك حب العشم..خيب ومطلعشي
وبعتلك مرسال الامل . اتقتل مرجعشي
معلهشي . انا مش هاسيب تاري
انا هاكسر باعك. وأدوقك اوجاعك
ورجعك لاصلك مادام عندي اصراري
★★★★★★
اصلك عايش فى داومة الدش
لما توهك ببحر النفاق والغش
وخاصمت الغيط والبتاو والمش
ورحمة امك لا احضنك واضمك
واغربل منك العوج والمك
واربطك فى شغول الصاري
★★★★★★
واخدك امرمغك بطين الريف
واسمعك موال بصوت الشواديف
والطشك بنسيم العصاري
واعشيك بطبيخ الكانون
واسقيك شاى الحلزون
على نار الحطب القايده بناري
★★★★★★
أحضنك واضمك واهيم
واعصرك زي الغريم
لحد ماتنضح حنين
لزمن الناس الطيبين
والمغرفه الخشب .
عاشقه قحف العصيده من سنين
بقالهم زمان ع الفرن مستنيين
زمن الطيابه يعود
وهمك يبقى من همي
وفرحي من فرح جاري
★★★★★★
شعر "سعيد حمدى محمد
13/1/2024
ليست هناك تعليقات:
إرسال تعليق