٠٠٠٠٠٠٠٠٠٠٠
خلي بالك
انت مكشوش
ومعاك جيش م الابطال
وجنود زي الوحوش
عمر الخوف منهم ماطال
متوزعين في كل مكان
متحكمين في الميدان
ادي فارس الفرسان
فتح سكة للوزير والفيل
والحصان صهلل زلزل المكان
والفيل قام بدوره
وكان قسيس وامام
والطابية دمرت وسارت
والعدو قوته انهارت
وطبول النصر رفعة الاعلام
وانا بهتف بروحي ودمي
ربي ينصرك دائماً يامي
يامحني ديل العصفورة
فريقتنا هي المنصوره
يامحني ديل العصفورة
الصورة مليانة دخان واهات
يامحني ديل العصفورة
الفرحة تاهت في عيون البنات
يامحني ديل العصفورة
الحلم مات في عيون الاولاد
وانت مش شايفني في الصورة
وانا كنت دايما الجندي الهومام
اللي كنت دايما في الصفوف قدام
اللي دايما شايل الهم
ومن سكات
وانا من قديم الزمان
بانيت الهرم والسد
وكأن ليا الف يد
وحفرت القنوات
وحقي في الحياة مات
وينكتب المجد اللي بنيته
للملوك والاسياد
وافضل انا شايل الهم
وانا مش بيدق في المربعات
دانا لحم ودم
انا خلقني ربي انسان
وهفضل اهتف كمان وكمان
يامحني ديل العصفورة فريقتنا هي المنصوره يامحني ديل العصفورة مصر هي المنصوره مصر هي المنصوره
حسني محمود إسماعيل
ليست هناك تعليقات:
إرسال تعليق