حبة رضا
يام الرضا عالمجروحين
أو طبطبه عالجرح لما يعيش سنين
حبة رضا دا النار بتاكل في الطحين
والحلم دايب جوا في أفران الحنين
حبة رضا
دا الفجر شايل فوق كتافه الطين
لو عدي صبح بيلمحك
في الحانه وسط السكرانين
حبة رضا يبقوا الغطا
يحموا العرايا الميتين
حبة رضا
نبدر بهم سكتنا والغيط اللي بار
نرسم بهم حبة امل فوق الجدار
حبة رضا يمكن يعدونا النهار
حبة رضا
للروح في بحر المستحيل
يمكن نلاقي في كفنا بكره الجميل
أو نلقى صبح بضحكته وسط النجيل
حبة رضا
لو تسمحي من غير دموع
قلبي استوى باش م الغنا جوا الضلوع
عمر الصلا ماتكون صلا غير بالخشوع
حبة رضا قبل اللي باقي ماينتهي
أو تنطفي اخر الشموع
حبة رضا نكسر بهم طول الطريق
ونلاقي روحنا منبته بعد العزيق
حبة رضا يام الرضا
بحق وحقيق
............. ........ ......
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق