يا جميل وجمالك رباني
والقُصَّة ف شعرك عجباني
وناديت على قلبك لبَّاني
دانا ملكك يابني وطوع أمرك
يا ابو قلب ملاك طيب حاني
وعزفت ف حبك ألحاني
يا ساكرني بحسن مالوش تاني
بشفايف منها يسيل خمرك
علشانك أعمل ما بدالك
كل اللي هيخطر على بالك
أهديك مُهجتي واوهبهالك
امشي على الشوك ونيران جمرك
لو قلت التمر بيحلالي
أول ما الكلمة تقولهالي
هطلع ع النخل إن كان عالي
ف ثواني يكون جمبك تمرك
وإن قلت النجمة دي عجباني
بتلالي ف ليلها وشدَّاني
راح أشق الفضا ليك ف ثواني
واخطفها عشان تضوي ف صدرك
وإن قلت النسمة مخيلاني
كل لما أبعدها تعود تاني
بتجيب كده شعري على وداني
راح اجافي النسمة عشان خاطرك
وإن قلت اللولي ده على بالي
ياما نفسي اشغله عقد يلالي
هغطس واختار منه الغالي
علشان يا حبيبي يكون مهرك
ياللي انت هواك غيَّر حالي
من بعد ما عشت سنين خالي
دانا بدعي تعيشلي وتبقالي
ولا يهجر ليلي ف يوم قمرك
طال عمرك
بقلمي/ خالد جمال ٤/١٢/٢٠٢٥
ليست هناك تعليقات:
إرسال تعليق