بقلم/نشأت البسيوني
في حياة كل انسان وجوه عدت قدامه من غير ما يقف معاها دقيقة وجوه شافها مرة واحدة وما افتكرش منها غير لمحة بسيطة وجوه ما عرفش اسمها ولا حكايتها ولا ليه ظهرت في الطريق واختفت بعدها لكن الغريب ان الوجوه دي بتفضل جواه من غير ما ياخد باله بتفضل موجودة كأنها علامة صغيرة اتزرعت في روحه الانسان فاكر انه متعلق بالناس اللي عاش معاهم وتكلم معاهم وشاركهم
تفاصيله لكن الحقيقة ان اللي بيفضل فعلا هم الناس اللي عدوا زي ضيوف ما قعدوش بس سابوا اثر بسيط يمكن ابتسامة من شخص غريب في يوم صعب يمكن نظرة حد شافك وانت واقف تايه في زحمة يمكن كلمة عابرة قالت لك خلي بالك من نفسك ومشيت
الوجوه دي ما بتتكرر في الذاكرة لكن بتتكرر في الروح وبتظهر لحظات من غير سبب لما تحاول تفتكر مين سندك وانت مش واخد
بالك او مين طمنك وانت كنت هتقع او مين ضحك وخلى يومك اسهل من غير ما يعرفك ولا يعرف قصتك الانسان ساعات يفتكر انه عدى على الدنيا لوحده وكل خطوة كانت بجهده وكل تعب كان بس صراع داخلي لكن الحقيقة ان الطريق مليان ناس ساعدوه من غير ما يقصدوا ناس ما يعرفوش ان وجودهم في لحظة قصيرة غير فيه حاجة او خلاه يكمل يوم ما كانش قادر يكمله فيه وجوه
بننسي شكلها بسرعة لكن بنفتكر احساسها فيه وجوه عدت في ثانية لكنها غيرت طريقة الانسان في النظر لنفسه او للدنيا من بعدها وفيه وجوه ما نفتكرهاش غير لما نكبر ونفهم ان مفيش صدفة كاملة وان كل ظهور ولو بسيط ليه معنى حتى لو ما عرفناهوش وقتها والاغرب ان الانسان نفسه بيكون وجه في حياة ناس كتير من غير ما يعرف بيكون ذكرى خفيفة لحد ما شافه في
طريقه وهو بيضحك او ذكرى لشخص ساعده بكلمة او حتى بوجود بسيط وما يعرفش انه ساب اثر حقيقي رغم انه ما كانش يقصد الانسان يفهم ان حياته مش مبنية بس على علاقات طويلة ولا على قصص واضحة حياته مبنية كمان على اللحظات الصغيرة اللي بينه وبين ناس ما يعرفش عنهم حاجة وعلى وجوه عدت واختفت لكنها شاركت في تشكيل جزء من روحه وفي اللحظة دي يعرف انه مش
لوحده ابدا حتى لو ما فيش حد ثابت جنبه يعرف ان الطريق كان مليان ناس ظهروا في الوقت الصح واختفوا في الوقت الصح وسابوا جواه نور خفيف يفضل منور مهما الدنيا ضلمت
ليست هناك تعليقات:
إرسال تعليق