بقلم/نشأت البسيوني
جوا كل يوم بنعيشه سر صغير مش ظاهر للعين ولا باين في الكلام سر بيتكون من لحظة فاتت ومن إحساس عدى ومن فكرة ما أخدناش بالنا منها سر يمكن يكون كلمة سمعناها من حد معدي يمكن يكون موقف هز القلب من غير ما يسيبه يقع يمكن يكون صبر شلناه من غير ما نشتكي أو وجع اتخبى جوا ضحكة كانت شكلها هادي ومطمن والغريب إن السر ده هو اللي بيغير شكل الأيام من
غير ما نلاحظ نلاقي فجأة إن اليوم اللي عدى عادي كان جواه ذرة قوة خلتنا نصمد في اللي بعده ونلاقي إن اللحظة اللي افتكرناها بسيطة كانت جواه رسالة ورسالة دي كانت سبب إن طريق كامل اتغير قدامنا وفي سر تاني بيكون جاي من جوا الروح نفسها الروح اللي بتتعب وبتحارب وبتسكت وبتتظاهر إنها قوية وهي من جواها بتدور على أي نقطة نور صغيرة الروح اللي تتعلق بأمل بسيط
وتحارب علشانه الروح اللي تتهز بس ما تقعش الروح اللي مهما الوجع وطّى صوتها تفضل جواها همسة بتقول كمّل لسه فيك حياة وفي أسرار تانية تتكوّن من الناس ناس جم ومشيو ناس سابوا أثر وناس سابوا وجع وناس علمونا حاجات ما كناش نتخيل إننا محتاجينها وناس كانت وجودها صدفة لكنها كانت أهم من ألف ترتيب ناس علمونا نختار وناس علمونا نسيب وناس علمونا إننا
منستحقش نص قلب ولا نص حضور ولا نص كلمة نكتشف إن الأيام مش بتتغير لأنها اتغيرت الأيام بتتغير لأن إحنا اتغيرنا لأن السر اللي جوا كل يوم كان بيغير فينا حاجة صغيرة ومع تراكم الصغير يبقى الكبير ومع الوقت نفهم إن التفاصيل اللي ما اهتميناش بيها كانت هي اللي بتبني فينا القوة اللي هنحتاجها بكرة
وفي لحظة مش محسوبة تلاقي نفسك اتبدلت من غير ما تقصد
بقيت أعمق في فهمك أهدى في غضبك أصدق مع نفسك أقرب لقلبك وأبعد عن اللي بيكسر روحك وتعرف إن الأيام اللي كانت تقيلة كانت بتدربك والأيام اللي كانت فاضية كانت بتريحك والأيام اللي كانت حلوة كانت بتطبطب عليك علشان تكمل وفي الآخر نلاقي إن السر اللي بيغير شكل الأيام مش يوم جديد ولا فرصة جديدة السر الحقيقي هو التغيير اللي حصل جواك من غير ما تحس
ليست هناك تعليقات:
إرسال تعليق