الايام اللي بنعدي فيها واحنا مش واخدين بالنا من نفسنا بقلم نشأت البسيوني

الايام اللي بنعدي فيها واحنا مش واخدين بالنا من نفسنا

بقلم/نشأت البسيوني 

في لحظات كتير الإنسان يمشي في الدنيا وهو مش واخد باله إن جواه عالم كامل عالم فيه خوف وفيه أمل وفيه تعب وفيه قوة وفيه حكايات ما اتحكتش لحد عالم مليان تفاصيل صغيرة بتغير في روحه كل يوم من غير ما يحس وكل يوم يعدي الانسان يفتكر إنه ثابت لكنه الحقيقة بيتغير بيتشكل بيتلون بيتعلم حاجات محدش قاله عليها وحاجات ما كانش متوقع إنه يعرفها أصلا

الايام دي اللي بنعدي فيها وإحنا مش واخدين بالنا من نفسنا بتكون في الحقيقة أهم من الأيام اللي افتكرنا إننا مستعدين ليها لأنها بتكشف جوانا حاجات ما كناش فاهمينها بتعلمنا يعني ايه نكبر من غير ما ناخد بالنا ويعني ايه نخفف عن نفسنا الحمل اللي شايلينه من مدة ويعني ايه الإنسان يكون محتاج نفسه قبل ما يكون محتاج حد وفي وسط الرحلة دي ييجي وقت نحس فيه إننا 

اتغيرنا بشكل ما نقدرش نشرحه نحس إننا بقينا هاديين أكتر في مواقف كانت بتعصبنا زمان ونحس إننا بقينا أقوى من قبل في مواقف كانت بتكسرنا بسهولة ونحس إن قلبنا بقى يفهم الناس أكتر من غير ما نتكلم كتير ونحس إننا مش محتاجين نفس الحرب القديمة لأننا اتعلمنا نسيب اللي مش لينا ونمسك في اللي يستاهل

والأجمل إن الأيام اللي بتمر من غير ما ناخد بالنا هي اللي بتبني 

جوا الإنسان صبر ما حدش يقدر يشوفه غيره هي اللي بتعلمه يخلي باله من نفسه ويعرف قيمتها ويعرف إنه لو انشغل بالدنيا زيادة هيفوت لحظات كانت كفيلة تغير نظرته لكل حاجة وفي لحظة صدق مع النفس الإنسان يلاقي إنه محتاج يقف لحظة يبص للسنين اللي عدت يشوف هو بقى مين واتغير ازاي وراح لفين ويكتشف إن اللي كان بيحصل كله كان ليه معنى حتى لو مكانش 

فاهمه وقتها الإنسان يكمّل الطريق وهو عارف إن الأيام اللي ما كانش واخد باله منها هي اللي ساعدته يكبر وهي اللي خلّته يوصل لنسخة أهدى وأنضج وأكثر فهم لنفسه