بهواك من قبل ماشوف دنيا
وعشقتك قول من سنة تانية
يابني انت جمالك حاجه تانية
رمشك قتال وعنيك جانية
همسك موال والروح حانية
شعرك سواح لف الدنيا
خدك فواح ريحته كولونيا
قدك يا غزال لأ حاجه تانية
دُبت أنا ف الحال رحت ف ثانية
وشبكني الهوى من نظرة عين
ابصم بالعشرة معاك واحلف
أنا مهما هقول عنك واوصف
عمري ما هوفيك حقك وانصف
بحلم لو قلبك يوم يعطف
على قلبي تصون وعده ما تخلف
والروح على لحن الشوق تعزف
على غصن هواك تصدح تهتف
وتميل على ورد كسا الخدين
عشت أنا قبليك طير متكتف
مكسور له جناح ريشه متنتف
ف سماه أعاصير ورياح تعصف
عن درب الهوى تبعد تحدف
خوفه كان جواه زلزال ينسف
بس اما هواك بقى متأسف
على ماضي اتعاش ف حاجات تكسف
على عمر وراح ف جراح تخسف
حبك داوى فيه كَسْر الجناحين
نبض وقلبين
بقلمي/ خالد جمال ٢٧/١/٢٠٢٦
ليست هناك تعليقات:
إرسال تعليق