لو مستعجل أو متأخر
سرَّع رِتمك شِد ومِد
لو ريح جالك فيك هيعفَّر
ريح بالك في الباب سد
ليه أحلامك كودها مشفر
احلم لو بالطول والعرض
حبة صبر يدوب مش أكتر
حلمك بكره يكون ع الأرض
حب الدنيا مهما تكشر
مهما تعاند فيك وتصد
شوفها عروسة بشعر مضفر
لو تناديلها عليك هترد
ليه تشتكي عدمان ومأشفر
رزقك فوقك مالهوش حد
حب الناس على قد ماتقدر
اوعى يكونلك خصم ولِد
اعمل خير من غير ماتفكر
ممكن حسنة ف ذنب تهد
اوعى يا عم ف حد تكفَّر
ربنا واحد كلنا عبد
ليه على حد ضعيف تتشطر
مدله إيدك ساعده بجد
اوعى ف يوم تكدب وتحَوَّر
لو على نفسك قول الصدق
ليه تتضايق او تتكدر
عيشها بطيبة وحب وود
دي حاجات ولا بالمال تتقدر
مالها مثيل لا شبيه ولا نِد
لا بتتصنع ولا تتحضر
مخلوقة فينا أباً عن جد
بقلمي/ خالد جمال ٣/٣/٢٠٢٦
ليست هناك تعليقات:
إرسال تعليق