نحكي على أغلى حاجة عندي
عيشة لكانت في دار جدي
أقعد واسمعها يا ولدي
وقت تعدى ليه زمان
جدي العيلة تمشي بقوله
باب داره خشب ومقفولة
ديمة مسكر بيت العولة
والخدمة جروصوه مع حيوان
ملي تدخل تلقى سقيفة
وع الدكانة يبيت ضيفه
الماء مالبير فقلة نظيفة
وبالتبن المخزن مليان
لداخل تلقى برشا بيوت
لولاد جدي عليهم حوت
قدر وحشمة حتى الموت
وليعصي ما ليه مكان
الغأر مغطي وسط الدار
ومالبويبه يدخل جار
المنسج يتسدى في نهار
واللمة سلفة مع جيران
جدي ديمه هو الكل
وكل مشكل ليه عنده حل
ما يسافر كان عالبغل
لا يشرب تاي ولا دخان
يصلي الصبح يعاود يرجع
أولاده يثورو لا من يمنع
ولي عليه ينادي يسمع
كل واحد يمشي لمكان
محلاها كانت عيشة معاهم
مالغابه خضرة لغداهم
والتمر. فزيره بحذاهم
وعالحيط شكاك الرمان
جدي ديمه فعام الخير
القمح رواني وكدس شعري
دهان وزيت وتمر كثير
وفي المخزن عالكل ألوان
كي نتفكر كيفاش كنا
عوايد سمحة كانت عنا
جدي الكل يخاف منه
رجال ،،،وذر،،،،مع نسوان
مع جدي ما يحكم حد
لا قال كلمة ما يعاود
في العيلة ما عنده ضد
قدره عالي عنده شان
فجيرانه عمره ما يسبب
عمي لزهر عمي طيب
ما فيهم شيء ليتخيب
مع بعضهم ديمة خيوان
لا ثمه فرق ولا تمييز
كل واحد علخوه عزيز
لاتسمع غش ولا تنقريز
وليحضر يملى لمكان
من غادي دار عمي عبيدي
بابه قلبي موش جريدي
الكل النادو عليه يا سيدي
ولاده ماتو عالاوطان
هاذي لمحة من حومتنا
الباقي قاعدة علذمتنا
لازم نحكيه براحتنا
ويتوثق. علطول زمان
بدرالدين احمد. القطار
ليست هناك تعليقات:
إرسال تعليق