وقفت في يوم أسأل نفسي.. في المراية
عشت الدنيا؟ ولا هي اللي عاشتني يا دنيا؟
مشيت في سكها.. ولا هي اللي مشتني؟
ضحكت معاها.. ولا هي اللي بكتني؟
قولت أنا عشتك يا دنيا.. بحلوك وبمرّك
شربت من كاسك.. مرة عسل ومرة سمّك
حبيت واتخدعت.. وصدّقت وكدبت نفسي
وقعت وقمت.. واللي سندني كان يأسي
بس لما فكرت.. لقيت الحكاية معكوسة
هي اللي عاشت فيا.. وأنا كنت الصورة
هي اللي كتبتني بدموعي.. وبفرحتي
*هي اللي رسمتني بوجعي.. وبضحكتي
الدنيا عاشتني طفل.. بيجري ورا فراشة
عاشتني شاب.. فاكر إنه ملك الدنيا لحاله
عاشتني راجل مكسور.. بيخبّي دمعته
عاشتني عجوز.. بيعدّ في سنينه اللي فاتت
أنا كنت مجرد ورقة.. وهي الريح اللي بتشيل
توديني مطرح ما هي عايزة.. وأقول ده قدري
تفرحني يوم.. تكسرني شهر*
*تاخد مني حبايبي.. وتسيبني أسأل: "ليه يا ربي؟
عشت الدنيا؟
ولا كنت ضيف تقيل على مائدة فرحها؟
آكل من طبق الحزن.. وأشرب من كاس الصبر
وكل ما أقول شبعت.. تحطلي طبق أكبر
يا دنيا فهميني.. أنا مين في الحكاية دي؟
أنا اللي بكتبك؟ ولا أنتي اللي بتكتبيني؟
أنا اللي بعدّي فيكي؟ ولا أنتي اللي بتعدّي فيا؟
أنا اللي بعيشك؟ ولا أنتي اللي بتخلصي عليا؟
بس عرفت في الآخر..
إحنا الاتنين عيشنا بعض
أنا عشتها بقلبي.. وهي عاشتني بقدري
أنا إديتها عمري.. وهي إدتني درسي
أنا كنت الحلم.. وهي كانت الصحيان
أنا كنت السؤال.. وهي كانت كل الأجوبة
فـ خلاص يا دنيا..
لا أنتي اللي كسبتي.. ولا أنا اللي خسرت
*طأدينا بنتعاتب.. زي اتنين عِشرة عمر
أنتي سرقتيني.. وأنا سرقت منك الصبر
أنتي وجعتيني.. وأنا اتعلمت منك الجَبر
وفي النهاية..
لا أنا عشتك.. ولا أنتي عشتيني
إحنا الاتنين عدينا على بعض
زي غريبين اتقابلوا في محطة
سلّموا على بعض.. وكل واحد كمّل في سكته
محمد السيد حبيب
ليست هناك تعليقات:
إرسال تعليق