ياللي هواك كان أحلى مصير
كان شوق قلبك ليا نصير
عشت العمر أنا قبلك أعمى
هلَّ هواك خلاني بصير
كت دنيتي من قبلك مُرَّة
جيت وسقيتني الشهد عصير
عيشتني وياك ف مسرة
بعد ما كنت لحزني أسير
عمر ما قلبك عني اتخلى
ولا حسيت ف هواك تقصير
كت فرشتي من جرح وعلة
والغطا كان من هم عسير
بقت الفرشة عيونك ديه
واتغطيت بهواك يا كبير
كت أنفاسي هوان ومذلة
والهوا كان قبلك أعاصير
حبك علَّى ف روحي وغلَّى
واتنفست أنا أحلى عبير
مهما زمانا ده فرق بينا
جنى على قلب وحب كبير
عمر الهوى ما هيصبح ذكرى
عمر الكوى ما هيبقى مصير
مهما تغيب هيزيد ليك حبي
مهما هتبعدنا المشاوير
أيوه بعيش وكأنك جمبي
أصل غيابنا مالوش تأثير
بكره زمانا هيجمع بينا
واخدك بين جناحاتي واطير
زي ملاك طار بيك ع الجنة
زي أميرة خطفها أمير
يحلى معاكي منامي وسهري
واقفل حضني عليك يا جميل
تبقى ف ليلي نجومي وقمري
تبقى ف صُبحي سِراج ومنير
أيوه أنا نفسي أديلك عمري
بس العمر يا غالي قصير
بقلمي/ خالد جمال ٢٤/٥/٢٠٢٦
ليست هناك تعليقات:
إرسال تعليق