حبك لعيني الشمس
والنور والهوا
عشقك لحزني الفرح ولجرحي الدوا
دانا لما تيجي عنيا
يا حبيبي في عنيك
بتوه ف دنيا الوعد والشوق والهنا
ولما تلمس ايدي خدك
بلقى فيك
كل الحنان والحب والميل والهوى
ولما تبعد عني
ببقى هموت عليك
واليوم تعدي عليا ساعته
بميت سنة
وان يوم عليا يهل قدك
بتجنن عليك
وخطاك تزيد القلب لوعة بحرفنه
ولما تسكن حضني
وادَّارى ف عنيك
بيغني نبض القلب يابني بسلطنة
بسمع شفايفي تقوللي
سيبني حرام عليك
ماقدرش اعيش
غير لما ادوب ف شِفاه أنا
مش برتوي غير بس منها
أبوس ايديك
من شهد سايل من ثنيات الهوى
يا حبيبي كل ما فيا
هايم بين ايديك
قلبي وعنيا ونبض روحي المفتنة
وكل حته ف جسمي
بتقول دايبة فيك
ومحال يا عمري
يكونلي يوم عنك غِنا
ملكك أنا وخلاص حبيبي
هموت عليك
هموت على
لحظة ما تبقى ف حضني أنا
ملكك أنا
بقلمي/ خالد جمال ١٨/٧/٢٠٢٦
ليست هناك تعليقات:
إرسال تعليق