وانا وياه بشعر بأمان
ببقى في قربه يا ناس هيمان
بنسى سنين مر وحرمان
قلبي يقوللي تعبت يا مان
نبضي بيشكي بقيت عدمان
وزهقت خلاص م الكتمان
عشقه ف دمي يا ناس إدمان
مهما يجافي انا فيه عشمان
قلبه يحن على الولهان
وان سهرني العمر كمان
لو ضاع مني انا مش ندمان
روحي بتسمع همسه كمان
يعزف لها أجمل ألحان
عاشقاه عيني بقالها زمان
من وقت ما كان بيبي بيسَنِّن
خِلِّي يشاوروا عليه بِبَنان
مالك قلب وروح وجَنان
نجم وسكنه السما ف عنان
لولي وماس ودهب رنان
ورده تغير منه الأفنان
بديه ود وشوق وحنان
وبدلع ياما فيه وبهنن
هوه عشان قده الفتان
قد غزال جامد جمدان
لو اقرب يبعد فدان
ويلففني وراه بلدان
من حارة لشارع لميدان
لما خلاص صابني الهَمَدان
ومن اللوعة يا ناس هتجنن
عزي وجاهي إن صابني هوان
عرش لقلبي لروحي إيوان
لمسة ايده لوجعي دهان
ورده في خده يا ناس ألوان
شفة تسيل على شفة روان
صوته يغير منه الكروان
دنا لو قلبي عليه ف يوم هان
عقلي يشت يجيلي ذُهان
حد يقوله يا ناس ولهان
يشعر بيا ف قلبه يحنِّن
بقلمي/ خالد جمال ٢٠/٧/٢٠٢٦
ليست هناك تعليقات:
إرسال تعليق