بتضحك للدنيا وبتسرقني مني
بتبيعني للكل وبتشتريني بالوهم
الضحكة فاعلٌ مرفوعٌ بالتصنّعِ
والقلبُ مفعولٌ بهِ مضروبٌ بالسكوتِ
بضحك عشان أداري
بس الدحكة دي كناية
كناية عن أنا متكسر من جوه
بضحك بصوتي وببكي بصمتي
دحكتي سلاحي ودبحتني
بضحك في الشغل عشان الرزق
بضحك في البيت عشان العيال
بضحك في الشارع عشان الناس
بضحك مع صحابي عشان مايقولوش مكتئب
بس مع مين أبكي
مع الحيطة الحيطة مالت
مع المراية المراية كسرت
مع نفسي نفسي باعتني
تَضَحُّكٌ ضحكٌ فوقَ الجرحِ بدمٍ
تَسَخُّرٌ سخريةٌ من قدري عشان ميتعبنيش
تَبَسُّمٌ ابتسامةٌ شايلة 100 هم
الدحكة الغشاشة دي بتاعت العامل اللي ضهره مقسوم
بتاعت الأم اللي ابنها مسافر
بتاعت الطالب اللي سقط
بتاعت المريض اللي الدوا غالي
بتاعت أنا وأنت وكلنا
إحنا شعب
بيضحك عشان مايعيطش
وبيعيط وهو بيضحك
اسمعوني
أنا مش مبسوط
أنا بس محترف دحكة غشاشة
دحكة تقول الحمدلله
والقلب يقول يا رب ارحمني
دحكة للكاميرا
وبكاء لرب الكاميرا
فإن رأيتموني أضحك
فابحثوا عن دموعي في ظهري.... بقلمي اشرف محمد ضمراني
ليست هناك تعليقات:
إرسال تعليق