كنت دابحلي معاك كام قطة
علشان بعشق فيك يا فروتة
كنت بدلَّع فيك واتمطى
كل حدود الهوى بتخطى
وانت عاملي تقيل وبروطة
كنت لقلبك زبدة وقشطة
كنت لغيرك فلفل شطة
كانت الروح جواها فيك حاطَّة
وانت الروح كت فيك منحطة
كنت فاكرني عبيط هلاهوطة
دانا م الأول كاشفك ياسطى
حيلتك كت من عينك نطة
تسرق تنهب تملى الشنطة
خنت وعمرك عشته ف ورطة
ونهايتك كت بوكس وشرطة
روح يا حبيبي نام واتغطى
قلبي خلاص لهواك اتخطى
كان غرضك من عشقك تِعلى
وتروق ليك الدنيا وتحلى
كان أملك عربية وفيلا
ماس وياقوت كردان ما شاء الله
تسهر تسكر ويا الشلة
لو هتدوس على قلب اتمنى
يلقى معاك النور والضلة
تبقى دواه من جرح وعلة
لو هتبيع حبي وتتخلى
عن قلبي اللي هواك من طلة
عن عين فِضلت فيك تتملى
عن روح كت لغرامك مايلة
صاينة الوعد لقلبك شايلة
وانت اتاريك بيا بتتسلى
واخد الشوق ملعوب ومحاولة
تغدر كده من أول جولة
بعت الهوى برخيص وبقِلة
واتمسكت بأحلام زايلة
عشت العمر الروح فيك ضالة
بعد الشوق والعشق ما ولى
انت أساك هوى بيك لمذلة
وانا من بعدك طيف واتجلى
بقلمي / خالد جمال ٧/٨/٢٠٢٦
ليست هناك تعليقات:
إرسال تعليق