جمالها شرقي على أوروبي
دي أجمل بنات حوا
في عنيها سحر خطف قلبي
سبحانه مين سوى
بتوه يا ناس لو فات جمبي
م الرقة دي ودلاله دَوَّه
وده ليا فين كان متخبي
غفلني رمشه أنا على سهوه
مافي شيء بايدي غلب غلبي
لا حول ليا أنا ولا قوة
معذور يا ناس وانا ايه ذنبي
أعشق عنيه ورموشه أهوى
ضحكتها نسمة في حر الصيف
كام ضحكة ممكن تستهوى
وكلامها دايماً ييجي ع الكيف
مالهوش لزوم فنجان قهوة
مشيتها لحن بميت إحساس
بيدق قلبي أنا ع الخطوة
دي جامدة طحن تعبت خلاص
على قلبي دايما تستقوى
كلمتها سيف ع الرقبة يا ناس
شخصية جد وليها سطوة
نبع المروءة وفيض إخلاص
ياه ع الشهامة وع النخوة
كان قلبي طيف
مخلوق ضعيف
علّاه هواه خلّاه اقوى
ده لحد أمس
كان حِسه همس
دلوقتي صوته عِلي ودوّى
كان نجمي مطفي
وهلقى حتفى
عاد ضيه لِيه في سماه ضوّى
قالوا زمان إن الهوى
أحسن دوا
للي اتحرم واللي اتوجع
بس المهم نصبر شوية ونتروّى
وانا قلبي صابر
ما اقدرشي اكابر
ده عشان حليوه وواد جدع
لو جمره قاد
لو وجعه زاد
لو حتى منه ببيتلوّى
يا اجمل بنات حوا
بقلمي/ خالد جمال ٢٧/٨/٢٠٢٦
ليست هناك تعليقات:
إرسال تعليق