شفتها كت ماشية بتتأصَّع
بحرير وموهير لولي مترصَّع
م الشوق واللهفة بتتوجع
قلبها بيقوللي أنا بتقطع
دقته مش دقة ده بيرزَّع
وانا قلبي ضعيف كده ومخسَّع
غمزتلي برمش عنيها السود
وقالتلي يا واد حبة ووسَّع
ف ثواني لقيتني اليه بخضع
مشَّاني وراه وانا متلوع
القلب من الشوق هيولع
بيسوق في دلاله و يتمنع
قولتلها انا واد عِترة ومجدع
فيها ايه لو نهوى ونتمتع
دانا واد حبِّيِب صيتي مسمع
لا جواز ولا شيء بينا هيمنع
بصتلي ما نطقت أي ردود
نظرتها يا ناس بتقوللي ارجع
همست وقالتلي يا حلو الروح
لو نِفسك فيا الدار مفتوح
روح كلم ابويا بعشقك بوح
وانا هبقى معاك لو فين هتروح
انما غير كده لأ مش مسموح
كسرت ف الروح أحلام وطموح
ومشيت وانا قلبي عليل مجروح
خاب أملي معاه وغلبني النوح
إني أبني في عشقي وَعَلِّي صروح
من غير تفكير رُحت مفلسع
على أول ناصية ملكني ذهول
قدام نفسي حسيتني خجول
قلت يا قلبي كِفايانا ميول
الهوى مش ليل رغبات مسكون
ولا عمره ما كان نزوات ومجون
ده الهوى إحساس للروح بيصون
فجر وزاح غيم أحزان وشجون
وجريت ورا قلبه واخدني فتون
وندهت عليه زي المجنون
فين ياض بيت ابوك لاحسن هرجع
بقلمي / خالد جمال ٦/٩/٢٠٢٦
ليست هناك تعليقات:
إرسال تعليق