في الحسن معدي حبيبي سنين
ومالوش أوصاف ف المعمورة
لو كان للحسن يا ناس قوانين
كانوا قبضوا عليه حلو الصورة
علشان تهديد أمن الملايين
بجمال كده مبني على خطورة
لو كان ليه رتبة وليه نياشين
ده بنسر وتلاتين دبوره
ده جماله بيخطف ضي العين
ويفوتها أسيرة ومبهورة
ويسيب جواها غرام وحنين
وهتعمل إيه ماهي معذورة
وخلاص بعديه هتبص لمين
ما هو غطى عليها بشبورة
والقلب هيامه ده واخده لفين
بيدق ودقته مطيورة
والعقل اهو تاه ويا التايهين
اختل من النظرة الأولى
والروح تتهادى شمال ويمين
فرحانة بحسنه ومسرورة
ده ملاك مش زي البني ادمين
ده جمال يتصنف اسطورة
بقلمي/ خالد جمال ٢٨/٨/٢٠٢٥
ليست هناك تعليقات:
إرسال تعليق