طبيت ف العشق أنا على ايدك
وسقيتني الشوق من عناقيدك
وسهرت الليل ويا المواويل
من نظرة ومن لمسة ايدك
اتنهد بسمع تنهيدك
لو بفرح يبقى ف يوم عيدك
والروح حساك والعين شايفاك
والدم إن سال سال ف وريدك
ياللي انت السحر عليك لاقلك
كان قلبي حزين قابلك راقلك
أول ما أخدني يا عمري هواك
شفت أنا بعنيك عشت بعقلك
خدتني من حزني ومن ألمي
وكتبت معاك فرحي بقلمي
كان قلبي وحيد ضايع وشريد
فوق أرض هواك رفرف علمي
فوق ممشى الشوق خطت قدمي
خليتلي وجود ومحيت عدمي
ندمان على عمر وقبلك ضاع
ونسيت ف هواك أسفي وندمي
طهرني هواك من زيف عابني
من ماضي هوى بقلبي تعبني
ورجعت معاك كما طفل برئ
من وقت ما سهم عنيك صابني
يا حبيبي هواك حرر قلبي
أنا بترجاك تفضل جمبي
مانا من غيرك للحزن أسير
ومعاك بيزول همي وكربي
بقلمي/ خالد جمال ٥/١٢/٢٠٢٥
ليست هناك تعليقات:
إرسال تعليق