أنا اللي فاضل
لما الكل مشي
ولما الوعود اتقطعت
ولما الضحكة بقت دين
ولما الفرح بقى قسط
أنا اللي فاضل
شايل شنطة عمري على ضهري
وفيها
ذكريات متكسرة
وأسماء اتنست
وأماكن اتقفلت
وأحلام اتأجلت لحد ما ماتت
بس لسه ماشي
مش عشان قوي
عشان لو وقعت
مين هيشيل اللي واقعين
أنا مش بطلب كتير
مش عايز قصر ولا دهب
عايز بس
ايد تتمسك وقت الخوف
وصوت يقول أنا سامعك
وعين تشوفني حتى وأنا مستخبي
انت فاكرني نسيت
أنا فاكر كل تفصيلة
فاكر ريحة الكلام الحلو
وفاكر طعم السكوت لما وجع
وفاكر اليوم اللي قلت فيه هبقى كويس
وكنت ساعتها بموت
الدنيا دي غريبة
بتديك دروس من غير كتاب
وبتاخد منك من غير استئذان
علمتني أضحك ودمعي نازل
أطبطب على غيري وقلبي موجوع
أقول الحمدلله وأنا متكسر من جوه
علمتني إن القوي هو اللي بيعيط في الحمام
عشان محدش يشوفه
في ناس سابوني وقالوا نصيب
وفي ناس باعوني وقالوا ظروف
وفي ناس نسوني وقالوا معلش
وأنا
ولا قلت نصيب
ولا قلت ظروف
ولا قلت معلش
قلت بس ربنا يسهلهم
عشان اللي بيحب بجد
حتى وهو بيتوجع بيدعي
بكرة
مش خايف منه
أنا خايف مني
خايف أتعود على الوجع
خايف أصدق إن ده آخرى
خايف أنسى إني كنت بحلم
بس لسه في حتة صغيرة جوايا
منورة
اسمها يمكن
يمكن بكرة أحلى
يمكن حد يفهم
يمكن أنا أستاهل
اسمعني
أنا مش بطل
ولا جامد
ولا خارق
أنا بني آدم
اتكسر 100 مرة
واتخيط 100 مرة
واتساب 100 مرة
وكل مرة قام
قام عشان في ناس مستنياه
قام عشان لسه في نفس
قام عشان
أنا اللي فاضل
فاضل أحب
فاضل أحلم
فاضل أصدق
فاضل أدي حتى لو ما أخدتش
فلو شفتني يوم ساكت
اعرف إني بتكلم مع نفسي
ولو شفتني يوم بضحك
اعرف إني بداري
ولو شفتني يوم ماشي
اعرف إني لسه اني
أنا اللي فاضل.... بقلمي اشرف محمد ضمراني
ليست هناك تعليقات:
إرسال تعليق