ابعد يا غرام مالي ومالك
أوعى ف يوم أخطر على بالك
ليك ذكرى ف قلبي شايلهالك
ولآخر مرة بقولهالك
مانا عقلي احتار من أعمالك
والقلب خلاص منك فاض بيه
دايب م الشوق ولا بتكلم
ويوماتي بأنّ وبتألم
بس محال لِيه قلبي يسلم
ماهو أصله من الماضي اتعلم
عمره ما هيهوّب يوم نواحيه
لو قاله سلام مش هيسلم
لو باح بغرام نبضه مبلم
ماهو جرحه يا ناس لسه معلم
والفجر معاه ليل بيضلم
ميت وازاي تقدر تحييه
مهما يلين لِيه هيكون ضده
لو حايل فيه برضو معارضه
لو تبكي عنيه مش هيواعده
ما فارقت خلاص جوه وأرضه
والجرح محال أيام تمحيه
ماهو آمنه زمان خانه وغدره
واتجنى عليه ولا يوم عذره
شفت أنا ف عنيه غضبه وشذره
ويا ريته احتاط أو خد حذره
ويقوله نصيب بخته وقدره
وحلفت ما اخطّي ف يوم ضواحيه
مهما هتكويه الشوق ناره
مش ممكن هيعود لمراره
ولا عمره هيرجع ف قراره
ومسيره هياخد يوم تاره
مش هوه اللي الجرح اختاره
زي ما بكاني هبكي عنيه
الله يسهلك يا اسمك ايه
بقلمي/ خالد جمال ٢٢/٨/٢٠٢٦
ليست هناك تعليقات:
إرسال تعليق