يا صاحبي الدنيا دوّارة
يوم ليك ويوم عليك
ويوم تلاقي نفسك ملك
ويوم تدور على رغيف ومش لاقيك
الغني اتغر بفلوسه
والفقير اتعز بعِزّة نفسه
والاتنين في الآخر
هيتغطوا بنفس اللحاف متر في مترين
قالوا زمان اللي فات مات
طب واللي جاي
قالوا اصبر
طب واللي في النص
قالوا اشرب شاي وروّق بالك
صاحبك اللي يضحك في وشك
اسأله الأول عايز ايه
عشان في ناس ضحكتها إيجار
وأول ما تخلص المصلحة يقولك مين
البنت الأصيلة
لو جاعت تاكل من بيت أبوها
بس عمرها ما تمد إيدها لحد
والولد الراجل
لو وقع يقوم لوحده
ويقول الحمدلله اتعلمت
اوعى تِأمّن لحد
حتى لو كان ضلك
عشان الضل ساعات بيختفي مع الغروب
والكلمة لو طلعت
بقت طلقة
يا تصيب يا تجيب أجلك
فـ وزنها قبل ما تقولها
وخلي لسانك في بُقك
أحسن من فلوسك في جيبك
الدنيا عاملة زي القهوة
سادة للي فاهمها
ومظبوطة للي ماشي حاله
وسكر زيادة للي بيضحك على نفسه
وفي الآخر يا ولد
اللي هينفعك
عملك وسُمعتك ودعوة أمك
وغير كده كله كلام جرايد
فـ اضحك
واشتغل
واستر
وامشي عِدل
عشان لو الدنيا مالت
تلاقي ضهرك هو اللي عِدِلها.... بقلمي اشرف محمد ضمراني
ليست هناك تعليقات:
إرسال تعليق