النوم خاصمني ولا بيدي
ما هواه ليلاتي يبات عندي
بستنى طيفه اما يعدي
واقول هشوفه واكون مرضي
دانا عقلي بيجيب ويودي
لو مرة يوم عندي يهدي
وتكون عنيه ملكي لوحدي
بحنان ايديه يلمس خدي
وف بحر عشقه يا خلق اعوم
لو هل بلقى معاه سعدي
وبكون كمان مش على بعضي
ف عنيه بشوف الكون وردي
خايف لاكون عديت حدي
أحلامي دي مش على قدي
ويكون حبيبي يا ناس مادي
مانا أصلي غلبان على قدي
معقولة بيا يحس ف يوم
لو كان عليا أجيبله الكون
من كل شكل وصنف ولون
مُلك سليمان أو مال لقارون
والروح تشيله وقلبي يصون
واروح وراه مطرح ما يكون
شمال يمين واعمل حلزون
ده عشان حبيبي العمر يهون
ويهون كمان ف هواه اللوم
بحلم يا ناس والحلم جنون
لو يوم تشاور أحلى عيون
وتقوللي دانا عشقاك بجنون
لادق طبل ورق وهون
واجيب كمانجه واكسليفون
واتنين شهود ويا المأذون
ونزيط كده ونعلي التون
ده حبيبي صار قدري المقسوم
بقلمي/ خالد جمال ٨/٩/٢٠٢٦
ليست هناك تعليقات:
إرسال تعليق