بحبها بس أنا متجوز
قالتلي فُكَّك يابني وروِّش
ما الشرع حلل ليك تتجوز
مثنى وثلاث وان عوزت تزوِّد
بس المدام طبعها بيخوِّف
دي من مفيش بلقاها تتنرفذ
لو قلت ليها إن أنا هتجوز
تقلب عليا في وشي تبوِّز
تفضل ف ليل و نهار تتنأوِز
وتقول ده بخت الأرعة كويس
ومش بعيد ألقاها تتعزز
تطلب طلاق على كله تكوِّش
أو تخلى بيا واموت واتجنِّز
دي كلامها فعل ومش بتهوِّش
فسألت صاحبي وقاللي أتريث
اركز كده ولا انت مهيس
مش يمكن السنيورة يا ريس
طمعانة فيك وعليك بتدلس
اعمِلَّها خيَّة عشان تعرف
عشقانة ولا عليك بتمَيِّس
روح قولها لو حتى هتحلف
إنك بقيت عدمان ومفلس
وعملت زي ما قاللي أتصرف
رحتلها وانا قلقان متوجِّس
قلتلها كل فلوسي اتصادرت
اكمني كنت ف عشقي مركِّز
بس اللي راح بالهوى يتعوض
وبالغرام والشوق هنكنز
خلَعِت أوام من غير ما تمهد
ما غرضها كان ع المال تستحوذ
اتاريها زي شيطان بيوسوس
إبليس وجاي عليا يأبلس
ورجعت بيتي وكان لي المنقذ
هعيش في ضله لحد ما اعجِّز
لعيالي وأم عيالي في قربي
عكازي ده اللي عليه بتعكز
وحمدت ربي كتير من قلبي
عشان ماقلتلهاش هتجوز 😄😄
بقلمي/ خالد جمال ٢٥/١٠/٢٠٢٦
ليست هناك تعليقات:
إرسال تعليق