وإحنا نعسانين تحت الشجر
دقت من زمان أجراس الخطر
وإحنا نعسانين تحت الشجر
جنب قلة فاضية وزير إنكسر
لاصحانا ٱذان الفجر
لاصحانا ضياع العمر
ولا برد نازل ولا مطر
وإحنا نعسانين تحت الشجر
بنحلم بالفارس المنتظر
وهوجاي راكب فرس
ينزع فتيل الجبن ويدق الجرس
يصحي النيام ويعيد بسيفه اللي إتهدر
بس مش هيلاقي البطل الفارس المنتظر
طريق ولا صحرا للفرس
ولا حتي صوته اللي اتحبس
خلف قضبان القفص
ولا حتي قلبه اللي إنكسر
وإترمي في أحضان الحجر
ولا شق ليله ضوء قمر
وإحنا نعسانين تحت الشجر
واقفين طابور إبن البلد
اللي إتجلد قدام عياله وإتظلم
في عهد البجم
اللي إترمي واللي إتحمي بخنزير العجم
وإحنا نعسانين تحت الشجر
بنحلم بأمجاد جدنا اللي بنا برج وهرم
بصخرة وكرباج من عصا واللي عصي
فيه إندفن
عشان حفيده بعد عمر يبتسم
ويغني بتاريخ جده اللي اتحرم
من وضع إسمه علي الحجر
وخلد بدمه وبقلم مماليك أتونا خدم
بقي فيهم أكتر من ملك
اللي صلح واللي هلك
واللي كتب إسمه علي الحجر
وصخر الهرم
أقدم تاريخ شافه البشر
وإحنا نعسانين تحت الشجر
غني الحفيد للحمار
غني الحفيد للخيار
وقريب يغني للبقر
قلنا النكت ونسينا قدسنا والحرم
اللي إندعس بأقدام نجس
ولا الطفولة اللي بكت
في صحن القدس وإشتكت
ظلم البشر
اللي ركع واللي رفع رايات الخذي
وضهره إنحني قصدي إنكسر
وإحنا نعسانين تحت الشجر
نايمين علي جدول من حطب
ساندين دماغنا علي شقفة من لهب
ومين السبب
سطور السلب وحروف الكذب
مين هد جدران المساجد
وجاب الغضب
مين خلا البنوك تتنهب
مين باع التراب والدهب
مين أجل قطار السفر
لسطح القمر
مين السبب
وإحنا نعسانين تحت الشجر
هي مرة واحدة قمنا
لما قام الجيش وثار
وعبرت جنودنا بصبرهم خط نار
وصاحو وقالو الله أكبر
وهدمو أكبر ستار
قالو يومها النصر خطة
ورسم عملوه الكبار
مايعرفوش إنه بدعاء وقت السحر
وكمان دعاء وقت الفطار
وبدم الشهيد اللي نبت
بعده الخضار
وإحنا نعسانين تحت الشجر
عملو للسكان مؤتمر
إتأمرو فيه علي طفل الحجر
ومرأة وشاب وكهل إحتضر
وإحنا نعسانين تحت الشجر
نومنا طويل وعزيزنا ذليل
وصبرنا أكبر من صبر أيوب
علي الضرر
صبر ودانا لطريق الجبن ولسؤالخبر
وإحنا نعسانين تحت الشجر
فالحين ومش فالحين الا علي بعضنا
وقادرين ومش قادرين وبناكل لحمنا
ومين زينا مين تاريخه من السنين
٧٠٠٠ سنه مين زينا
مسجونين مقتولين مسروقين
ولسه الفطار والعشا عندنا
لسه السواقي في الغيطاني
بتروي قمحنا
يابختنا
لسه بيزقزق عصفورنا علي فروع الشجر
لسه بتلقط شمسنا حبات المطر
وإحنا نعسانين تحت الشجر
ياريت سهرنا علي الطحين وعجينا خمر
وقمنا خبزنا شقتين لضيفنا القمر
ماكنا إحتاجنا الدولتين ولا بعنا الأثر
ماكنش راح منا الفرات ولا نيلنا في خطر
وإحنا نعسانين تحت الشجر
دقت حمامة سلام علي ودننا
اصحي يا مصري واصحو وفوق ياعرب
البساط إتشد من تحتنا
وسبقتنا القمم
إصحو وفوقو مش نافع ندم
محتاجين صحوة عرابي إبننا
محتاجين روح رمضان إكتوبر
وصرخة جندنا
محتاجين صلاح الدين
وضحكة أمنا
محتاجين تنور شرارة عنيناحينا
محتاجين سيل المطر
يطهر الأرض من ظلم البشر
اللي ركع واللي رفع رايات الخذي
وضهره إنحي وقصدي النكسر
و إحنا نعسانين تحت الشجر
كلمات سيد حجازى
ليست هناك تعليقات:
إرسال تعليق