فيه ناس كتير صدّقني عايشة كويس
وناس كويس إنهم عايشين
فيه كلام كتير مفروض أكيد يدّرس
بس مين هيقرا ومين هيسمع مين
فيه ناس دموعها في العيون بالكوم
وناس عشاها تكمّله بالنوم
وناس تعلّي كل يوم في مباني
وكروش بتكبر يعني يوم ورا يوم
فيه ناس تبيع م الجوع بقى ولادها
لجل إن توفّر هِدمة أو ذادها
وناس كتير بيبيعوا في ضميرهم
نسيت حساب الآخرة وميعادها
مين اللي قال كلّنا ولاد تسعة
وعشان تعيش واجب عليك تسعى
فيه ناس بتسعى لحد يوم ما تموت
وناس تعيش وكلاها بقى والعة
الدنيا عاملتنا واللهِ كالمفرمة
وكل لحظة وجع فوق وشّنا معلّمة
ولا جاتش يوم الدنيا صالحتنا
ولا حتى يوم فكّرت تسمعلنا مظلمة
فيها أكيد اللي إتولد محظوظ
اللي بيفطر شهد ويحلّى بعده بلوز
فيها كمان اللي إتولد في السيرك
حَب الفقيرة اللي زيه وصاحِب الأراجوز
عايش حياته من شتات لشتات
ما هو لا ابن باشا ولا حتى إبن ذوات
يتعب ويمرض إيه يعني مايهمّش
وإن مات أكيد هيقولوا كلب ومات
و بعد موته ماشية الحياة عادي
والكل زيُه عايش بقى وراضي
ده لا كان معاهم ولا حتى م الحاشية
وأبوه لا ظابط ولا خاله كان قاضي
نفس الشريط ماشية الحياة مكمّلة
ناس عايشة مطحونة وبردوا متحمّلة
وناس تقول وتعيد والكل يسمع لها
وناس في لقمة عيشها واللهِ متسلسلة
بكره ميزان العدل راح يتنصب تاني
وإن اللي عاش في القهر والذل بيعاني
بكره يشوف العدل على إيد إله عادل
والحق ياخده غصب من اللي كان جاني
بقلمي عبدالحميد وهبه
ليست هناك تعليقات:
إرسال تعليق