عايش ف حيرة وربكة
مهموم وصابني القهر
لا عارف اشتري شبكة
ولا حتى احوش مهر
ومرتبي العيان
مريض بفرط الحركة
يخلص ف نص الشهر
مقلولة منه البركة
قصدير وصابه الصهر
ولا نافع أشكي زمان
ولا حتى ألوم الدهر
طول عمري ماشي حلال
في السر او في الجهر
وماليش ف سكة شمال
ولا حتى ارافق عُهر
جِري سني مني أوام
ولقيتني فاتني القطر
والعمر عدى وفات
ماليش سند ولا ضهر
ولا عادتشي فيه خِلَّان
واتخلوا عني الأهل
ولا حتى عندي عيال
يشيلوني يوم القبر
تايه من الأحزان
معرفش ليل من ضهر
وحبيبي باعني وخان
بايديه سقاني الغدر
بشرب أسى وحرمان
واللقمة جرح و مر
صابر على الأحوال
وبقول مسيرها تمر
ييجي بكره ألقى أمان
ويزول سواد العمر
ملِّيتني طولة البال
زهًّقت مني الصبر
ينفع كده يا زمان
يرضيك يا عم الزهر
بقلمي/ خالد جمال ٣٠/٨/٢٠٢٦
ليست هناك تعليقات:
إرسال تعليق